श्रीसिद्धभक्ति - असरीरा जीवघणा उवजुत्ता

श्रीसिद्धभक्ति

अथ पौर्वाह्निक (अपराह्निक) आचार्य-वन्दना-क्रियायां पूर्वाचार्यानुक्रमेण, सकलकर्मक्षयार्थं भाव-पूजा-वन्दना-स्तव-समेतं श्रीसिद्धभक्तिकायोत्सर्गं कुर्वेऽहम्। (9 बार णमोकार)

असरीरा जीवघणा उवजुत्ता दंसणे य णाणे य।

सायार-मणायारा लक्खण-मेयं तु सिद्धाणं॥ 1॥

मूलोत्तर-पयडीणं बंधोदय-सत्त-कम्म-उम्मुक्का।

मंगल-भूदा सिद्धा अद्ठ-गुणातीद-संसारा॥ 2॥

अट्ठविय-कम्म-वियला सीदीभूदा णिरंजणा णिच्चा।

अट्ठ-गुणा किदकिच्चा लोयग्गणिवासिणो सिद्धा॥ 3॥

सिद्धा णट्ठट्ठमला विसुद्ध-बुद्धी य लद्धि-सब्भावा।

तिहुअणसिर-सेहरया पसियंतु भडारया सव्वे॥ 4॥

गमणागमण-विमुक्के विहडिय-कम्म-पयडि-संघादा।

सासय-सुह-संपत्ते ते सिद्धा वंदिमो णिच्चं॥ 5॥

जयमंगल-भूदाणं विमलाणं णाण-दंसणमयाणं।

तइलोय-सेहराणं णमो सया सव्व-सिद्धाणं॥ 6॥

सम्मत्त-णाण-दंसण-वीरिय-सुहुमं तहेव अवगहण्णं।

अगुरु-लघु-मव्वावाहं अट्ठ-गुणा होंति सिद्धाणं॥ 7॥

तव-सिद्धे णय-सिद्धे संजम-सिद्धे चरित्त-सिद्धे य।

'णाणम्मि दंसणम्मि य सिद्धे सिरसा णमस्सामि ॥ 8॥

इच्छामि भंते। सिद्ध-भत्ति-काउस्सग्गो कओ तस्सालोचेउं सम्म -णाण-सम्म-दंसण-सम्मचरित्त-जुत्ताणं, अट्ठविह-कम्म-विप्पमुक्काणं-अट्ठगुण-संपण्णाणं उड्ढलोय- मत्थयम्मि पइट्ठियाणं तव-सिद्धाणं, णय-सिद्धाणं, संजम-सिद्धाणं,चरित्त-सिद्धाणं अतीदा-णागद-वट्ठमाण-कालत्तय-सिद्धाणं सव्वसिद्धाणं णिच्चकालं अंचेमि पुज्जेमि वंदामि, णमंसामि-दुक्खक्खओ कम्मक्खओ बोहिलाहो सुगइ-गमणं समाहिमरणं जिणगुण संपत्ति होउ मज्झं।

_______________________________________________